ဒီမိုကရက်တစ် အစိုးရနှင့် ပြည်သူ့အကျိုးပြု အခြေခံဥပဒေ

ဒီမိုကရက်တစ် အစိုးရနှင့် ပြည်သူ့အကျိုးပြု အခြေခံဥပဒေ

ကျော်ကျော်စိုး

စက်တင်ဘာ ၃ ၊ ၂ဝ၁ဝ

၁။  နိုင်ငံအား ဒီမိုကရေစီအခြေပြု နိုင်ငံရေးစနစ်သို့ ပြုပြင်ပြောင်းလဲရာတွင် ရွေးကောက်ပွဲများ  ပြုလုပ်ကြသည်။ အဘယ်ကြောင့်နည်း။

နိုင်ငံတနိုင်ငံတွင် ပြည်သူများက အစိုးရတရပ်ကို ဒီမိုကရက်တစ် အစိုးရတရပ်အဖြစ် ပြောင်းလဲသင့်ပြီ ဟုဆိုလျှင် ပထမဦးဆုံး ပေါ်ပေါက်လာလေ့ရှိသည်မှာ ရွေးကောက်ပွဲ ဖြစ်သည်။ မြန်မာနိုင်ငံတွင်လည်း ၁၉၉၀ ခုနှစ်က ပါတီစုံ ဒီမိုကရေစီ အထွေထွေ ရွေးကောက်ပွဲကို ကျင်းပခဲ့သည်။ ၁၉၈၈ ခုနှစ် ဒီမိုကရေစီ အရေးတော်ပုံက မြန်မာနိုင်ငံတွင် မြန်မာ့ဆိုရှယ်လစ် လမ်းစဉ်ပါတီ (မဆလ) ၏  တပါတီ အုပ်ချုပ်ရေးစနစ်မှ ဒီမိုကရေစီအခြေပြု နိုင်ငံရေးစနစ်သို့ ပြောင်းလဲရန် အာဏာသိမ်း စစ်အစိုးရက ရွေးကောက်ပွဲ ပြုလုပ်ခဲ့သည်။ ယခုတဖန် ထိုစစ်အာဏာရှင်များကပင် ဒီမိုကရေစီသို့ ပြုပြင် ပြောင်းလဲရန် ဟုဆိုကာ ရွေးကောက်ပွဲ ပြုလုပ်မည်ဟု ဆိုပြန်သည်။

အစိုးရအဖွဲ့၏ ရည်ရွယ်ချက်များ၊ အစိုးရအဖွဲ့၏ ဖွဲ့စည်းပုံများ အပါအ၀င် ပြည်သူပြည်သားအားလုံးနှင့် သက်ဆိုင်သော ကိစ္စအ၀၀ကို အတိအကျ ရေးသားဖော်ပြထားသည့် ဖွဲ့စည်းပုံ အခြေခံဥပဒေကို ရွေးကောက်ပွဲ မကျင်းပမီ အရင်ဦးစွာ ရေးဆွဲ သတ်မှတ်ကြသည်များလည်း ရှိသည်။ ထိုကဲ့သို့ အခြေခံ ဥပဒေ ရေးဆွဲ သတ်မှတ်ခြင်းနှင့် ရွေးကောက်ပွဲ ကျင်းပခြင်းများသည် ပြည်သူလူထု ကိုယ်စားပြုသော အစိုးရတရပ် ပေါ်ထွန်းလာရေးအတွက် လိုအပ်ချက်များ ဖြစ်သည်။

ဤနေရာတွင် ကြီးစွာသတိထားရန် လိုအပ်သည်မှာ အာဏာရှင်များသည် ရွေးကောက်ပွဲကို ပြည်သူ လူထုအပေါ် လက်ဝါးကြီးအုပ် ချယ်လှယ်နိုင်ရေးအတွက် နည်းလမ်းတခုအဖြစ် အသုံးပြုသည်၊ ၄င်းတို့  အုပ်ချုပ်မှုသည် တရားမျှတ မှန်ကန်မှု ရှိသည်ကို ရွေးကောက်ပွဲမတိုင်မီ အကြိုကာလအတွင်း ၀ါဒဖြန့် ဆွဲဆောင်နိုင်ရန် လုပ်ကိုင်လေ့ရှိသည် ဆိုသည်ပင်ဖြစ်သည်။

မည်သို့ပင်ဆိုကာမူ ရွေးကောက်ပွဲတရပ်သည် ဒီမိုကရေစီသို့ ဦးတည်လျှောက်လှမ်းရေးအတွက် ပထမ ဦးဆုံးသော ခြေလှမ်းတလှမ်း ဖြစ်သည်။ ဒီမိုကရေစီသို့ ဦးတည်သည် ဆိုရုံဖြင့် အလွယ်တကူ မယုံကြည်သင့်ပေ။ ထိုခြေလှမ်းကို လက်ရှိ အုပ်ချုပ်နေသူများက မှန်ကန်စွာ လျှောက်လှမ်းခြင်း ရှိ-မရှိ ဆိုသည်ကို လတ်တလော အခြေအနေများ သို့မဟုတ် ဖွဲ့စည်းပုံ အခြေခံဥပဒေပါ အချက်များဖြင့် ချိန်ထိုး ဆန်းစစ်ရန် လိုအပ်သည်။

၂။  ရွေးကောက်ပွဲသည် ဒီမိုကရေစီ ပြုပြင်ပြောင်းလဲရေးအတွက် ပထမခြေလှမ်းဟုဆိုလျှင် ထိုအဆင့် အောင်မြင်ရေးအတွက် မည်သည့်အချက်သည် အရေးကြီးသနည်း။

ဒီမိုကရေစီ ပြုပြင်ပြောင်းလဲမှုကို ဆောင်ရွက်သည့်အခါ အောင်မြင်မှုရလိုပါက ပထမဦးဆုံးအနေဖြင့် နိုင်ငံကို အုပ်ချုပ်နေသည့် ခေါင်းဆောင်များက ဒီမိုကရေစီတွင် မည်သို့သော အကြောင်းအချက်များ ပါဝင်နေသည်၊ ရှိနေသည်ကို လေ့လာ သိရှိ သဘောပေါက် လက်ခံရေးနှင့် ထိုအတွက် အခြေအနေများနှင့် ကိုက်ညီစေရန် လက်ရှိ တည်ဆဲအခြေအနေများကို ညှိနှိုင်းပြောင်းလဲမှ ဖြစ်မည်။ ထိုသို့မဟုတ်ပဲ လေ့လာမှု မပြုပါက ဒီမိုကရေစီအရေး ကြိုးပမ်းမှုများသည် ဖျက်ဆီးခံရခြင်း သို့မဟုတ် ကြိုးပမ်း လှုပ်ရှားသူများကို အာဏာချုပ်ကိုင်ထားသူများက ဖယ်ရှားခြင်းများ ပြုလုပ်လိမ့်မည် ဖြစ်သည်။ ထိုသို့သော အခြေဆိုက်လာပါက အမည်ခံ ဒီမိုကရေစီ ပြုပြင်ပြောင်းလဲမှုသာ ဖြစ်ပေါ်လာလိမ့်မည်။

၃။  ဖွဲ့စည်းပုံ အခြေခံဥပဒေနှင့်အညီ ရွေးကောက်ပွဲ မှတဆင့် ဖွဲ့စည်းဖြစ်ပေါ်လာသော အစိုးရသည် ဒီမိုကရက်တစ်အစိုးရဟု ခေါ်ဆိုနိုင်သလား။

ဖွဲ့စည်းပုံ အခြေခံဥပဒေနှင့်အညီ ဆိုသည့် စကားရပ် ပါလာသည့်အတွက် ဖွဲ့စည်းပုံ အခြေခံဥပဒေနှင့် ပတ်သက်၍ အနည်းငယ် ရှင်းလိုပါသည်။ ဖွဲ့စည်းပုံ အခြေခံဥပဒေကို ရေးဆွဲတော့မည်ဆိုလျှင် နိုင်ငံတွင်းရှိ ပြည်သူအားလုံး၏ အလွှာအသီးသီး၊ အုပ်စုအသီးသီးကို ကိုယ်စားပြုသည့်သူများ ပါဝင်ရန် လိုအပ်သည်။ ထိုကဲ့သို့ အခြေခံဥပဒေ ရေးဆွဲမည့်သူများသည် နိုင်ငံအစိုးရက အုပ်ချုပ်ရေး လုပ်ငန်း တာဝန်များကို အဆင်ပြေချောမွေ့စွာ လုပ်ဆောင်နိုင်ရေးကို အားဖြစ်စေရေးအတွက် ဦးတည် ရေးဆွဲနိုင်ရေးကို အလေးထားရမည် ဖြစ်သည်။ အကယ်၍ ဖွဲ့စည်းပုံ အခြေခံဥပဒေက အစိုးရ ခေါင်းဆောင်များ သို့မဟုတ် တဦးတယောက်က အာဏာထိန်းချုပ်ရေးကို အာမခံချက်ပေးထားသည့်  တပါတီ နိုင်ငံရေးစနစ်ကို ကျင့်သုံးရာရောက်နေပါက နိုင်ငံသူနိုင်ငံသားများ၏ လုပ်ပိုင်ခွင့်ကို ကန့်သတ် ချုပ်ချယ်ခြင်း ဖြစ်နေသောကြောင့် အဆိုပါနိုင်ငံသည် ဒီမိုကရေစီ ထွန်းကားသောနိုင်ငံ ဖြစ်လာမည် မဟုတ်ပေ။ အဆိုပါအချက်များကို ဖယ်ရှားပြုပြင်ပြီး ပြည်သူက ထိန်းချုပ်ကွပ်ကဲသော အစိုးရတရပ် ပေါ်ပေါက်လာရေးကို အာမခံမှသာလျှင် အဆိုပါနိုင်ငံတွင် ဒီမိုကရေစီ ထွန်းကားမည် ဖြစ်သည်။ ထိုကဲ့သို့သော အကြောင်းအချက်များကြောင့် ဒီမိုကရေစီကို “ပြည်သူများအတွက် ပြည်သူများက အုပ်ချုပ်သော နိုင်ငံရေးစနစ်တရပ်” ဖြစ်သည်ဟု ခေါ်ဆိုကြခြင်း ဖြစ်သည်။ ထို့ကြောင့် ပြည်သူ လူထုက ရွေးချယ်တင်မြောက်လိုက်သော အစိုးရ ဖြစ်တိုင်း၊ ဖွဲ့စည်းပုံ အခြေခံဥပဒေနှင့် ညီညွတ်တိုင်း ဒီမိုကရက်တစ် အစိုးရဖြစ်သည်ဟု မဆိုနိုင်ပေ။

ကျော်ကျော်စိုး

sayarkway@gmail.com

Dwonload file – Democratic Govt and Constitution for People

…………