အာဏာရှင် ဗိုလ်ချုပ်သန်းရွှေ၏ တရုတ်ပြည်ခရီးစဉ်အား ဆန့်ကျင်ဆန္ဒပြပွဲ တိုကျို တရုတ်သံရုံးရှေ့မှာ လှုပ်ရှား (၇-၉-၂ဝ၁ဝ)

တိုကျိုရှိ တရုတ်သံရုံးရှေ့တွင် ၂ဝ၁ဝ ရွေးကောက်ပွဲ ဆန့်ကျင်ရေး ကော်မတီမှ မြန်မာ့ဒီမိုကရေစီ အင်အားစုများက တရုတ်နိုင်ငံသို့ သွားရောက်လည်ပတ်သည့် အာဏာရှင် ဗိုလ်ချုပ်မှူးကြီး သန်းရွှေအား ဆန့်ကျင်ကန့်ကွက်သည့် လှုပ်ရှားမှု (၇-၉-၂ဝ၁ဝ)

နအဖ စစ်ခေါင်းဆောင် ဗိုလ်ချုပ်မှူးကြီး သန်းရွှေ တရုတ်နိုင်ငံသို့ သွားရောက် လည်ပတ်သည့် ခရီးစဉ်အား ဆန့်ကျင် ကန့်ကွက် ဆန္ဒပြပွဲ လှုပ်ရှားမှုတခုကို ဂျပန်ရောက် မြန်မာ့ဒီမိုကရေစီ အင်အားစုများ၏ ၂ဝ၁ဝ ရွေးကောက်ပွဲ ဆန့်ကျင်ရေးကော်မတီ (ဂျပန်) မှ တိုကျိုမြို့ရှိ တရုတ်သံရုံးရှေ့တွင် ညနေ ၃း၀၀ နာရီ မှ ၄း၀၀ နာရီအထိ ပြုလုပ်ခဲ့ပါသည်။
ဆန္ဒပြပွဲ ကျင်းပရခြင်းမှာ အဆိုပါ ခရီးစဉ်သည် ၎င်း၏ စစ်အာဏာရှင်စနစ် သက်ဆိုးရှည်ရေးအတွက် တရားမျှတမှု မရှိသည့် ၂ဝ၁ဝ ရွေးကောက်ပွဲမှ ထွက်ပေါ်လာမည့် ရလဒ်အား တရုတ်အစိုးရမှ ထောက်ခံပေးရန်နှင့် အသိအမှတ်ပြု ပေးနိုင်ရေးအတွက်ပါ ကြိုးပမ်းနေသည့် အပြင် ကုလသမဂ္ဂ လုံခြုံရေးကောင်စီမှာ အရေးယူမည့် ကိစ္စရပ်များတွေကို အကာအကွယ်ပေးရန် ရည်ရွယ်ချက် ခရီးစဉ်ဖြစ်သည့် အတွက် ယခုလို ဆန့်ကျင် ကန့်ကွက် ဆန္ဒပြပွဲ ကျင်းပရကြောင်းကို ကျင်းပရေးတာဝန်ခံ တဦး၏ ပြောပြချက်အရ သိရှိရပါသည်။
ဆန္ဒပြပွဲကို စက်တင်ဘာလ(၇)ရက်နေ့နှင့် (၈)ရက်နေ့များတွင် ပြုလုပ်သွားမှာဖြစ်ပြီး တရုတ်အစိုးရအား တိုက်တွန်း တောင်းဆိုသည့် စာတစ်စောင်ကိုလည်း မနက်ဖြန် ဆန္ဒပြ နောက်ဆုံးရက်နေ့တွင် ၂ဝ၁ဝ ရွေးကောက်ပွဲ ဆန့်ကျင်ရေးကော်မတီ (ဂျပန်)မှ ပေးအပ်မည် ဖြစ်ပါသည်။ တိုက်တွန်းတောင်းဆိုသည့်စာတွင် နအဖ စစ်အစိုးရကို အကာအကွယ်ပေးသည့် လုပ်ရပ်များနှင့် စစ်အာဏာရှင် သက်ဆိုးရှည်စေမည့် ပံ့ပိုးကူညီသည့် လုပ်ဆောင်ချက်များ ရပ်ဆိုင်းပေးရန်အတွက်ပါ ထည့်သွင်း တောင်းဆိုထားကြောင်း သိရှိရပါသည်။

သတင်းမှတ်တမ်း။ Mai Kyaw Oo
မှတ်တမ်းဓါတ်ပုံ။ Lian Khan Sum(CNC-Japan),Myo San Oo(BDA)

http://www.pnsjapan.org/2010/09/blog-post_07.html